Кондак 8 / Икос 8

Кондак 8

Странно слышати и неудобно разумети злым неверием омраченным, како от святых икон Твоих, Владычице, знамения и чудеса бывают: нам же тепле верующим словеси, Тобою к первоначертанной благовестником евангельских тайн святей иконе реченному: благодать родшегося от Мене и Моя с сим образом да будет, удобно есть разумети и праведно уповати, яко и с сею святою Твоею иконой «Грузинскою» блпгодать Твоя и сила пребывает выну: сего ради с благоговейным страхом предстояще, чтем и воздаем ей честь, яко Тебе самой, нам присущей, радостно поюще Богу: Аллилуиа.

Икос 8

Вся присно горе сущи с Небесными Силами выну пребывающи, нас земнородных не оставляеши, Богомати, теплым предстательством пред Сыном и Богом Твоим, матернее бо дерзновение к Нему имаши. Сего ради предстояше пречистому Твоему образу, со слезами покаяния вопием Ти, Богородительнице

  • Радуйся, Путеводительнице верная, к небесному отечеству добре нас направляющая;
  • Радуйся, Мати Царя небеси и земли, врата райские нам отверзающая.
  • Радуйся, Домостроительнице, житие наше к небесному устрояющая;
  • Радуйся, вечные блага Сына Твоего нам являющая.
  • Радуйся, от скорбей и бед зде нас спасающая;
  • Радуйся, вечных мук и огня геенского по смерти нас избавляюшая.
  • Радуйся, всех притекающих с верою и любовию к Тебе сугубо милующая;
  • Радуйся, молитвы наша, приносимыя Тебе пред чудотворным Твоим образом, ко престолу Сына Твоего и Бога нашего возносящая.
  • Радуйся, благая наша Помощнице;
  • Радуйся, непостыдное наше упование и верное спасение.
  • Радуйся, Невесто Неневестная.